Facebook Page

Saturday, November 17, 2012

ပါစကတေဇော ခေါ် ၀မ်းမီး - ၂

          ဂဟဏီကို ၀မ်းမီးလို့ ဘာသာပြန်ကြပါတယ်။ အမှန်မှာ ကမ္မဇကံစွမ်းရည်ဖြင့် စတင်ဖြစ်ပေါ်
ပြီး ဂုဏ်အရှိန်သုံးပါးနဲ့  ပြည့်စုံတဲ့  စွမ်းရည်ပဲဖြစ်ပါတယ်။   ထိုအရှိန်စွမ်းရည်    တည်ရှိတဲ့နေရာက
အကြောခွေအတွင်းမှာ ဖြစ်နေလို့ တည်နေရာကို အကြောင်းပြုပြီး ၀မ်းမီးလို့ ခေါ်ပါတယ်တဲ့။ ၀မ်းမီး
မှာ စွမ်းရည်သုံးရပ် ရှိပါတယ်။

(က)     မျှတစွာ ကြေကျက်ခြင်း
(ခ)      တစ်ဘက်စွန်းမရောက် အပိုအလိုမရှိပဲ ထုတ်လုပ် နိုင်ခြင်း။
(ဂ)      ထုတ်လုပ်ပြီးသမျှ ဓာတ်ကြီး ခုနှစ်ပါးမှာ အညစ်အကြေးကင်းစင်ပြီး အပိုအလိုမရှိ မျှတစွာဖြစ်
           နေရပါမယ်။လူသားတစ်ယောက်ရဲ့ ဘ၀ကို မွမ်းမံတည်ဆောက်ပေးနေတဲ့ ဝမ်းမီး၊ဓါတ်မီး၊ခုခံ
           အားစွမ်းရည် ကောင်းနေသရွေ့ သြဇာဓာတ် အပြည့်အ၀ပါတဲ့ အစာ၊အာဟာရတွေကို လည်း
           စားသုံးနေရင် ကျန်းမာမယ်၊အသက်ရှည်မယ် ၊အန္တရယ်ကင်းလွတ်မှာ ဖြစ်ပါတယ်။

          ထိုဝမ်းမီးရဲ့  စွမ်းရည်ကို မြန်မာ့ရိုးရာတစ်လျောက်လုံးမှာ ၀မ်းတစ်လုံးကောင်း ခေါင်းမခဲ ဆိုတဲ့ 
စကားနဲ့ လမ်းညွှန်ဖော်ပြထားပါတယ်။ထိုလမ်းညွှန်ချက်မှာ လွန်စွာနက်ရှိုင်းပြီး၊ တန်းဖိုးလည်း မဖြတ်
နိုင်ပါ။
          ၀မ်းမီးနဲ့ ဂဟဏီအကြောင်းကို စာအုပ်ထဲမှာ ယခုလိုပဲ ထပ်ပြီးရှင်းထားပါသေးတယ်။

          ၀မ်းမီး နှင့် ဂဟဏီ

          မြတ်ဗုဒ္ဓ သည် ၀မ်းမီးကို ဂဟဏီဟု သုံးစွဲတော်မူခဲ့ပါတယ်။ခန္ဓာကိုယ်မှာ အသက် ရဲ့ တည်ရာ
ဖြစ်တဲ့ ဓာတ်ကြီးရှစ်ပါးတို့ ကို ထုတ်လုပ်ဆောင်ရွက်ပေးနေတဲ့ အပူရှိန်တစ်မျိုးလည်း ဖြစ်ပါတယ်။
ဆေးကျမ်းမှာတော့ (ပါစက+ အဂ္ဂိ) ပါစကဂ္ဂိ ကြေကျက်စေတတ်သော မီးလို့ သုံးကြပါတယ်။အဲဒါ
ကြောင့် ဂဟဏီ ဆိုတဲ့ စကားဟာ ပါစကတေဇော ပါစကမီး ၀မ်းမီး စတာတွေနဲ့ အတူတူပဲ ဖြစ်ပါတယ်။
ဆေးကျမ်းမှာ ပြဆိုထားတာက ကုသာသကတေဇော ဟုခေါ်တဲ့ ဝမ်းမီးဟာ အစာအိမ်ရဲ့ အောက်ဘက်
ချက်ရဲ့ ဘယ်ဘက် လက်လေးသစ်အကွာမှာ ရှိတဲ့ စန္ဒမဏ္ဍလ လိုခေါ်တဲ့ အကြောခွေအတွင်းမှာရှိတဲ့
သူရိယ မဏ္ဍလဆိုတဲ့ အကြောခွေ အလယ်မှာ ရှိတယ်လို့ ဆိုပါတယ်။လူဘ၀မှာ မဓာနကျတဲ့ သည်း
ခြေဖြစ်ပြီး ပါစကသည်းခြေ လို့ လည်း ဆိုပါတယ်။
          အဖွင့်စကားမှာတော့ ဒီလိုဆိုထားပါတယ်။
          လနေနှစ်စင်း၊ ကြောခွေတွင်၌ ထွန်းအိမ်မှန်၊မီးသဏ္ဍာန်သို့ ၊တည်ဟန်ဝမ်းမီး၊ ရှိထပြီးကာ၊
ထိုမီးနှင့်သား၊စာသစ်အိမ်၌၊ ပမာမုယော၊ ပါစကောဟု၊ ခေါ်သောသည်းခြေ၊ ရပ်တည်နေလျက်၊
စားလေသမျှ၊ အာဟာရကို၊ မွမွညက်ကြေ၊ ချက်၍ချေခြင်း၊ တစ်ထွေထိုမှ၊ စားသမျှကို၊ ရသတစ်
သွယ်၊ ကျင်ကြီးငယ်ဟု၊ သုံးသွယ်ခွဲဝေ၊ ကျန်လေးထွေသော၊ သည်းခြေတို့ အား၊ ကျေးဇူးပါ၍ ၊ဆင့်
အားထောက်ကူ၊ သက်စောင့်ဟူသည်၊ မူရင်းမဓာန၊ ပါစကသည်၊ ကမ္မကြောင်းခံသတည်း၊
လို့ ဆိုထားပါတယ်။ပါစကတေဇော ခေါ် ၀မ်းမီးဟာ မဓာနကျကျတည်နေပါတယ်။ရဉ္စက သည်းခြေ
ကတော့ သွေးမှာတည်နေပြီး သွေးသား သန့် ရှင်းမှု ကြည်လင်မှု အားရှိမှုတွေကို ဖြစ်စေပါတယ်။
သာဓကသည်းခြေကတော့ နှလုံးမှာ တည်နေပြီး နှလုံးအာရုံကြော ဦးဏှောက်အသိဥာဏ် စသည်
တို့ ကို ဖြစ်ပေါ် ကြည်လင်စေတတ်တဲ့  တာဝန်ကို ထမ်းဆောင်ပါတယ်။   
         လောစကသည်းခြေ၊ ဘာစကသည်းခြေ၊ ရဉ္စက သည်းခြေ၊ သာဓကသည်းခြေ စတဲ့
သည်းခြေလေးမျိုး တို့ ကို အားရှိထက်မြက်စေရန်နဲ့ ဆောင်ရွက်နေရတဲ့ တာဝန်တွေကို ပြည့်ဝ
နေစေရန်အတွက် ၀မ်းမီး ခေါ် ပါစကသည်းခြေ ကို ပြုပြင်ပေးရပါမယ်လို့ မြတ်ဗုဒ္ဓ က ဟောခဲ့ပါ
တယ်။ပါစကတေဇော သည်လည်း ကမ္မတေဇောကနေ ပြောင်းလဲလာခြင်းဖြစ်ပါတယ်။ကမ္မတေ
ဇောဆိုသည်မှာလည်း လူ့ ဘ၀အစ ပဋိသန္ဓေ အခါ ကပင် ဦးဆောင်တည်ဆောက်ပေးနေတဲ့
ဓာတ်တစ်မျိုးဖြစ်နေပါတယ်။လူသားကို မွေးဖွားပြီးချိန်မှစပြီး ပါစကတေဇော ဟာ စားသမျှအာဟာ
ရတို့ ကို စတင်ချက်ခဲ့တာဟာ သေသည့်တိုင်အောင် ဖြစ်ပါတယ်။လူ့ စွမ်းရည်ဖြစ်တဲ့  အကြည်ဓာတ်
ခြောက်ပါးကို ဆက်လက်အားပြုပေးတာကတော့ အာဟာရပင် ဖြစ်ပါတယ်။အဲတာကြောင့် မြတ်
ဗုဒ္ဓက အာဟာရသမုဒယော ရူပသမုယော အာဟာရရဲ့ အကြောင်းကြောင့် ရုပ်ကြီးတည်နေတယ်
လို့ ဟောကြားတော်မူခဲ့ပါတယ်။
          ဒါကြောင့်မို့ လည်း အင်မတန်အရေးကြီးတဲ့ အာဟာရကို စားရရင်ပြီးရော ဗိုက်ပြည့်ရင်
ပြီးရော သဘောမထားကြပဲ၊ ကြေကျက်လွယ် ပြီး တစ်ဘက်စွန်း သို့ မရောက်တဲ့အာဟာတွေကို
မျှတစွာ ဖြည့်တင်းကြဖို့ အထူးလိုအပ်လှပါတယ်။

ဝမ်းမီးကို စောင့်ရှောက်ဖို့ အတွက် ၀မ်း နဲ့ အခါး ဆက်စပ်မှုကို ဆက်လက်ရေးသားသွားပါ့မယ်။
 
 
          

No comments:

Post a Comment

မြတ်ဗုဒ္ဓ၏ ၀ိပဿနာ (ကျောက်အိုင်တောရ)


Posted by Khin Win on Thursday, May 28, 2015